1- من ساعة ما حطيت البتاعة اللى فوق على اليمين اللى بتقول انا هاكتب ايه فى الفترة الجاية وانا مش عارف انفذ منها حاجة لكثرة المستجدات، مش عارف يبدو ان فى مؤامرة
2- الصورة اللى فوق دى نقلا عن مدونة أحلى ما فى الدنيا
3- يمكن متابعة تغطية للفرح على مدونة اللى جوايا للباشمهندز محمد الذى سعدت بمعرفته المنشد العام للإخوان المسلمين
نبدأ الموضوع :
لقد فقدت العزوبية يوم السبت الماضى، رجلا ولا كل الرجال
بطلا ولا كل الأبطال
مناضلا ولا كل المناضلين
وودعت قهاوى الجيزة هذا البطل الأشم محمد عبد الناصر
فلقد تم يوم السبت الماضى زفاف السيد الدكتور محمد عبد الناصر صقر على زوجته السيدة سمية عصام العريان، وذلك فى حفل عائلى بهيج.
وقد تزوج المدعو عبد الناصر عن عمر يناهز الرابعة والعشرين عاما، وكان العريس خريجا لكلية الطب ويقضى هذا العام سنة الامتياز والتدريب بقصر العينى، وقد كان للعريس فى السنوات الماضية نشاطا طلابيا وفنيا فى جامعة القاهرة.
بارك الله للعريسين وبارك عليهما وجمع بينهما على خير، ولا أراكم الله مكروها فى عزيز لديكـ... أقصد والعقبى عندكم فى المسراااااات
ألف مبروووووووووووووك يا ناصر الجواز ويارب تهدى بقى شوية وتبطل بلطجة على خلق الله الغلابة، وتغير شوية معاملتك لنسيبك إبراهيم.
يللا الدنيا حظوظ عبد الناصر يقعد مع أهله وأحبابه ليؤنسوه والجعلى يقعد مع جحافل الناموس لينغصوه.
على كل حال انا قضيت امبارح يا عبد الناصر ليلة من اجمل ليالى حياتى . .
بس علشان الناس تكون معانا فى الصورة وتحكم بيننا فانا سأضعهم فى دائرة الاحداث سريعا..
انا وعبد الناصر –العريس- نقضى سويا فترة الامتياز والتدريب، ومن حسن طالعى أن أجد السيد عبد الناصر –برضه العريس- معايا فى نفس الوحدة اللى قضينا فيها الشهرين اللى فاتوا، طبعا الشيطان سول لى أن أبعد عنه واتعرف على زملاء جدد وأخترت نبطشياتى ولا سيما الليلية منها بعيدا عنه لأفاجأ بالقدر يصوب لى خطأى واجد السيد عبد الناصر معى فى النبطشية الليلية بعد ان قام بتغيير نبطشيته مع زميل آخر كان من المفترض ان يكون هو معى ...
وامعانا منه فى الحب والتقدير لى قرر المدعو عبد الناصر دون علمى أن يختار لى نبطشيات ليلية معه فى هذا الاسبوع الذى يعقب زواجه، وهو بالطبع يعلم مسبقا أنه لن ياتى وسيكون فى شهر العسل، اختارنى لأكون معه فى هذه النبطشيات وهو غائب لعدة اهداف:
1- أن أقوم بتغطية غيابه لانه لن يأتى
2- أن أظل وحيدا لأعلم فائدته فى الحياة
3- أن لا أجد صديق آخر يحل مكانه لدى
4- بعض المعانى والدروس التربوية من الوحدة والتأمل
وفعلا قد كان ذهبت بالأمس للوحدة وحيدا، ومن تبعات زواج عبد االناصر الجميلة أن التكييف بالوحدة كان معطلا، فقضيت ولله الحمد فترة نبطشية ليلية رائعة وحدى بين الناموس – وما ادراكم ما ناموس القصر العينى- وبين الحر. بالطبع تذكرتك يا عبد الناصر بكثير من الدعاء فى هذه اللحظات، بس ربنا يستر عليك بقى من نتائجها.
ألف ألف مبروك يا عبد الناصر وعقبال نسيبك ابراهيم – تقريبا بيقولو على اخو العروسة نسيبه وفى حاجات تانية غريبة زى عديله مش عارف ايه المصلطحات دى- وربنا يسعد ايامك ويجعل زواجك بداية لانطلقك وابداعك فى مشوارك الدعوى والحياتى.
واطمن يا باشا كله فى السليم والأمن فى الوحدة مستتب وكتبت امبارح المعامل كلها وفايتلت القسم - فايتلت من فعل vital وهو يعنى قياس الضغط ونبض المرضى- وكمان حضرت عملية stap neck مع د.حسام ود. محمد حسن ود.عمرو بهائى والدكتور المحروقى. وكانت ليلة يا عريس.
مستنيييييييييييينك بفارغ الصبر لما ترجع لنا على خير وربنا يسترها فى النبطشية الليلية القادمة، يااارب لطفك من الناموس والحر.
يللا يا جماعة الكل يقول للعريسين: بارك الله لكما
لا يا جماعة عايزين الصوت اعلى انت ما اتعشتوش ولا ايه " لازم فى كل فرح الراجل اللى بيقدم يقول الجملتين اللى فاتوا دول" يللا بصوت اعلى :
بارك الله لكما وبارك عليكما وجمع بينكما على خير
بارك الله لكما وبارك عليكما وجمع بينكما على خير
بارك الله لكما وبارك عليكما وجمع بينكما على خير
18 التعليقات:
ياعم ده أنت كاتب كلام كتير قوي...
وجاي تحسدني على كلمتين في السريع بعد الفجر!!
على العموم عقبال ما يغطي عليك في بنائك يا باشا...
وكلنااااااااااااااااااا لهاااااااااااا ولله الحمد!
أخوك/
المنشد العام للإخوان المسلمين
الحمد لله اني اول المهنين على المدونة ..بارك الله لكما وعليكما وجمع بينكما في خير...وعقبالك يا جعجوعي
بارك الله لهما وبارك عليهما وجمع بينهما على خير
والله يسامح الدكتور محمد على أخذه سميه مننا :(
رزقهما الله السعاده في الدنيا والاخره
وأسعدني كثيرا أخذكم الصورة [ أول تصميم لي على الفوتشوب:)] شرف كبير أتمنى أن يمتد لأرى تعليقاتكم بمدونتي
جزاكم الله خيرا
بارك الله لهما وبارك عليهما وجمع بينهما فى خير
خدها ورااااااااااااااح ... اسكندريه :D
يالا ربنا يسامحك يا محمد والبنت اختى دى وحشتنى اوى ... عايزة احكيلها على احوالى وعايزة اعرف احوالها بس مش عارفه اتلم عبليها ... ربنا يرزقهم السعادة فى الدنيا والاخرة
الف مبروك يا محمد
والف مبروك لاختنا
وبارك الله لكما وبارك عليكما وجمع بينكما فى خير
بس ايه يا دكتور جعلى
عمال تعمل مواضيع اختفال بافراح الناس .. مش ناوى تعملها عشان نعملك موضوع ولا ايه
صدقنى .. لو عملتها انا وغيرى كتير هنعملها معاك
ونعملك مواضيع فى كل مكان
بس شد انت حيلك بقى :)
بارك الله لهما وبارك عليهما وجمع بينهم في خير
جعلي
انا بعت ناصر ومحضرتش الفرح
بس انا كان عندي افتتاح المعرض اللي الشركة مشاركة فيه
وكنت لازم ابقي موجود
وحاولت كتير والله كتير اني امشي بدري علشان الحق الفرح بس معرفتش لان الاستاذ الوزير اللي كان بيففتح امي المعرض جيه قعد في الجناح بتاعنا وكنت لازم ابقي موجود
بقولك يا جعلي
ممكن لو شفت ناصر تبلغه سلامي
وتقولوه مجدي باعت اسفه قبل تهنئته
ويللا مش مهم
الف الف مبروووووووووووووووك
لمحمد عبدالناصر وحرمه
على زواجهما الكريم
وبارك الله لهما وبارك عليها
وجمع بينهما في خير
تعليقات سريعة
جعلوني
الله يسامحك ياعبدالناصر
عمل فيك ايه الدكتور عبدالناصر صقر
ده حتى تلاقيه يدوب سمع اسمك ولا سلمت عليه في مرة
وبعدين استر على اخوك عشان ربنا يسترها معاك
لازم يعني جه النبطشية معايا وسابني
مع الناموس وراح هوا مع زوجته
ربنا يسترها عليك ساعة زواجك
أسماء العريان
يااااااااااااه كل هذا الكلام على يوم واحد , ان شاء الله مسيرها ترجع
وتحكو لبعض حكاااوي كتييير ة جدا
معلش تعليقاتي دي
عشان عبدالناصر ابو زمل
ومسيري قريب اكون مكانه ومش عايز حد
يعمل فيا كده
يلا يا دكتور جعلي الدور أقرب منك قوي ... كل أصدقائك بيبعوك ... يا خوفي ألقي شاهين عملها قبل منك وساعتها هيبقي الناموس في كل حتة :)
مبروك للعروسين ... مش ممكن كل ما أدخل مدونة اجد هو دا آخر موضوع :)
مبروك للجميع :)
بارك الله لكما وبارك عليكما وجمع بينكم فى خير يا دكتاره اخر زمن
يا بتوع التزويغ رنا يصلح حالكم وعقبال يا جعلى بس تبقى واخد اجازه مش مزوغ
مبارك لك فوزك في أستفتاء المدونات الاكثر تاثيرا في قرائها
جعلك الله ساعيا للخير مؤثرا في الغير
مبروك يا عبدالناصر
كنت لسه بجيب في سيرتك انا والجعلي
بارك الله لكما وبارك عليكما وجمع بيناكما في خير
الي اولئك الذين المتهم صور اقتتال الاخوة الاشقاء في فلسطين
الي كل من تخيل ان الاخوة الاشقاء باعوا القضية لاعدائهم واجهزوا علي ماتبقي منها
الي كل من انجر وراء حملة التضليل الاعلامي التي ساقوها علينا
الي كل ساع الي الحقيقة
الي كل هؤلاء اهدي
التبيان في اقتتال الاخوان
تجدونه فقط
في
ارض الحرب
ربنا يباركلهم و يسعدهم يا رب
:):)
اسلوب حضرتك لذيذ :d
ربنا يكرمك
:)
انتى هتذلنى يا احمد يا جعلى على يوم ... غطيتنى فيه
يا ما غطناك وسترنا عليك
يعنى غطتنا بايه يعنى بلبسك الجميل الى ميس لالاى قعدت اشادت بيه واعجبت بيه وانبهرت بيه
ماشى ياعم .. عقبال ما نجى نخدمك ونغطى نبطشيتك فى فرحك
عندى عروسه..... عايز اغطيك
محمد عبد الناصر صقر
ههههههههه
يا مرحب بالعريس وحمد الله على السلاااااااااااامة
وبعدين الله يكرمك بلاش فضايح وبلاش نتكلم فى موضوع لالى ده، الحكاية مش ناقصة
(:
وبعدين الغلط مش غلطى انا كنت رايح الجامعة أقوم بمهمة الاشراف الطبى على الامتحانات، ألاقى تليفون بيقول لى حول مسارك.. يبقى انا ذنبى ايه!!
وبعدين انا بش باذلك بانى غطيت عليك يا عريس أن بس بامن عليك يمكن ينولنا عزومة جامدة فى بيتك الجديد ولا حاجة، وبعدين زمان كان الواحد بيعمل الخير وبيقول ربنا يجازينا عليه خير وخلاص ونحاول نخليها صدقة سر، انما الناموس اللى انا شفته يوم النباطشية دى ما ينفعش معاه صدقة السر
(:
ألف مبروووووك يا عريس والله واحشنا جدا واكيد هاشوفك قريب ان شاء الله
...
شكرا لكن من شاركنا التهنئة ويارب عقبال ما نجامل الجميع فى أفراحعم
الف مبروك للعروسين
الاستاذ محمد (اللي بيقولي الشريرة)و الزوجة الكريمة سمية(اللي غالية علي اهلها )وحمد لله علي السلامة واتمني لكما التوفيق في حياتكما
That was a VERY interesting one! Seriously interesting.